Nyujuh Bulan

          Buka nekepin andus, bikas I  Sambyar tusing nyidang engkebang uli omongan pisagane. Mula ja jlema lebian jaruh, degag apa buin demen ngaenang timpal sakit. Adanne gen I Sembyar, jlema bikasne tusing taen teteg, omongane gen kangin kauh, satata baninne ya ngaba pepineh anak len utamanne raos gurune.  To makrana tusing ada anak disamping bani paek, apa buin nemenin, sajabane reraman pagelahane.

Yen nuju mapapasan di rurunge apa buin di jalan tusing taen ngelah keneh nyambatsara anak, iteh paningalane beneng nyingak jalan, sing misi biin matulihan kangin kauh,  apa buin makenyung manis teken anak len, asane mael sajan ia ngelah bibih, yen anak disisi ngorahang kenken ja  cara ental magulung bibihne, minab ulian marasa teken ibanne sugih apa buin sakti ulian malajah kawisesan teken balian Guru Tegeh di Desa Pananggun Bucu.

Beh ……yen orahang papayasane I Sembyar yadiapin tusing ada rerahinan kajeng kliwon,  satata ya masaput poleng, maudeng ngenjir  ,  macelek dikupingne bunga pucuk wari bang, basangne gede ngondel – ngondel  , pangadegne endep mokoh kenken ja cara bedogole ane  ngapit di lawang kori agung purana, to ba cihna manusane nyapa kadi aku, ensap teken padewekanne kaliwat belog, ngandelang kasugian rerama muang kabisan gurune dogen.

Jani nuju ya rahina perwani pananggal 14 sasih ka dasa, makeneh ia nyimpanin gurune, kabenengan sabilanga matakon ilmu prangaksa jiwa ane palajahina asasah ane suba liwat. Di Pasemengane suba ia gegesonan majalan kaki,  sawetara jam 10,  matan aine suba sayan negehang, neked masih I Sembyar di aepan umah Guru Tegeh maka gurune. Ditu di Bale Bandung sisi kaja ane maukir maprada mas, Guru Tegeh masila tiding , mabusana papatihan, iteh mamaca ental kakawin Arjuna Wiwahane sambilanga  grengeng – grengeng padidian misi ngemu kekinangan  , makawinan di natahe liu masamburan paes barak kekinangane, nyak suba cara natah kuruksetrane ane kaebekin baan getih.

Mara kawaca  di wirama Toþàkane    : úaúi wimba hanéng ghaþa mési banyu, ndan asing úuci nirmala mési wulan……., suba ya nanjek a baris , ditu kaslagien baan panekanne I Sembyar.  Tindakan batisne nengkejutin cicing selem Guru Tegeh ane medem di bataran sisi nanggu kangin bale saka pate, makada ngongkongin panekane I Sembyar ane  tusing ada panyamatsara sakondenne.

Ngencolang tindakanne   I Sembyar  ngojog ka bale daja tongos Guru Tegeh maca kakawin, ulian iteh ngebitan lontar sambil mamaca kakawin, kanti tusing renga teken panekanne I Sembyar. Guru…….guru……guru………tiang niki I Sembyar rauh. Keto pakaukanne I Sembyar . Sawetara Guru Tegeh, sinambi nlektek - nlekkang nyen ane teka, kewala  ulian munyin pakaukane Guru Tegeh suba ya bisa nenger nyen ane teka.

Yeh I Sembyar…………….!, keto panyamatsara gurune,  mai – mai ja negak malu!  mai paekin ja dini bareng – bareng guru. Suba ya pada negak masila, Guru Tegeh nyemak biin pacanangane, laut kicaka , sinambi ya matakon, nak kenken ne Sembyar? cara magegesonan asanne teka buka jani………….!, apa nu inguh ngenehang omongan pisagane ditu?, apa kal ada takona unduk aji pangraksa jiwa ane kaplajahin asasih ane malu, nang caritaang teken guru. 

I Sembyar laut nyaurin patakon gurune, sada nu heran teken laksanan gurune ane prajani karasa matungkalik dingeh malajahang wirama kakawin.  Ten ja saking nika guru, napi ja sane kadalih ring padewekan tiang, tan patut rengayang tiang, kaden asapunika pituduh guru ring tiang.

            Sada ningehang pasautne I Sembyar  gurune iteh masih ngebit – ngebitin ental, laut biin matakon, sada ngajum teken gurune. Duh ….nembe  dadosne tiang miragiang guru ngwacen kakawin sakadi puniki, ri antukan salami tiang malajah riki acepok pendo rasayang tiang, guru nenten naenin ngambil ental kakawin puniki, wenten napi niki ?. Ha….ha …..ha  manis pakedekan Guru Tegeh, ke……kene nyen…… Konden Guru Teges nyarik ngraos, sepanan biin ya nglanturang patakonne, ulian ia dot sajan nawang unduke ento.

            Wawu saking jabayan tiang miragiang gending wiraman gurune ne  wkayakti lengut kapireng tiang, satmaka I kedis tuhu – tuhu ne bengong tan mari makrisikan natakang tembang wiramane. sane nenten  sakadi biasane guru ngwacen ental kawisesan sane aeng – aeng , ngregep angkian nunggalang bayu sabda idep, napi malih kalanturang ngerehang sastra, mangkin makesib tiang , wenten napi niki, santukan ampun lintangan ring asasih tiang tan naen nyujug pakubone driki.

            Guru Tegeh, laut nimpalin raos I Sembyar ane nu tusing ngerti teken ane kacingak buka jani.            Sembyar …..sembyar…. Da ja guru gugula cara kaketo…..!!!Ne tuah ja swadharma adane ,Sing ja cara Sembyar , pepinehe bawak   satata buyar, cara adanne…….. tusing taen tekek ngaba pepineh…..!  ha……ha……ha……nak mula keto ajak magonjakang, apang ada dasar bebaosan.

              Sambilanga nlektekang isin entale saka besik,  Guru Tegeh mapineh – pineh di kenehne, bakal ngorahin I Sembyar nglanjutang paplajahane ane malu, kewala paplajahan dharma patut , kewala boya ja bakal nilar paplajahane ane malu. Ditu Paes barak Guru Tegehe kakecuhang ka natahe, satmaka nyiriang bakal ngawitin ngraos ajak I Sembyar biin.

              Kene nyen apang tawang Sembyar, apang masih dadi ingetang kayang kawekas, Ne…ne….dingehang ja jani raos guru ! Mapan suba nyen makelo adanne sembyar malajah dini. Liu suba paplajahane, liu suba maan ngalih gegaen nyandenang anak, jani suba dauhne Sembyar baang guru ajahan ane mautama. Napi…….napi  nika  guru ? , ngencolang I Sembyar nyelag raos gurune, ulian meled kenehne dot   nawang pituduh gurune.

              Kene raos Guru Tegehe, Sembyar…….orahin men jani ! Saenun ragane idup, tusing ja makrana iraga sakti, bisa nyujuh Widhi, ane motama to nyen lascarya bhakti ken Widhi , bhakti ken wong len, cara iraga nyujuh bulan, matritisan sunarannyane ane neduhin jiwa pramana, nyujur dharma patut ! . Ningehang keto pituduh raos gurune, satmaka suaran tatite ngempengin kuping ipunne , makada barak makrana sing anut teken ajah – ajahan ane malu, karasa mabalik kuri tur  matungkalik raos guru ne buka jani.

              I Sembyar natakin raos gurune baan rasa jengah, ulian konden ngerti teken maksud gurune:  Mangkin …..mangkin  … dumun guru ! Men napi suksmane guru ngajahin tiang selami niki , yening mangkin guru mabalik kori karasa ngalih widhi masadana dharma patut ?Ditu , muan I Sembyar karasa barak , kenken ja cara tiuk diprapene ne kakuwub baan api, keto barak muane I Sembyar, karasa nalihin paplajahane pelih.

              Ditu ia ngusap peluh muane ane ngetel , sambilanga makirig tegak naenang raos gurunne ane karasa mabalik kori, sing teteg teken laksanane nyalanang balian kiwa. Heran macampuh inguh I Sembyar sambilanga masih naenang angkianne ane suba ngancan nyengahang.

              Nyingakin laksanan I Sembyare buka keto, nyaruang raga Guru Tegeh ngebitang etale biin. Makelo Guru Tegeh nengil , sambilanga nelisikin saka besik isin entale, anggone nimpalin pituturne ane mara. Laut inget Guru Tegeh ada ental ane madan putru sangaskarane, ane nyritayang pajalan sang atma,  Ditu lantas Guru Tegeh  nimpalin biin raosne I Sembyar, Ih Sembyar, da …nyen malu carika raos gurune, nah……..!!!Mapan , paplajahan ragane  ane suba – suba,  konden nyen maadan pragat, yen konden malajahin dharma patut !, to  ane madan kiwa kalawan tengen yen tusing cakupang  dadiang besik, sing nyen nyidang ngalih ane madan  Sanghyang Siwa Tunggal, ane maraga bayu, ane ngingkupin yeh kalawan api , ida ane maraga  sampurna.

              Ulian raos gurune buka keto, resep lantas I Sembyar, O…….o…….nggih ….nghih…. !Wawu kamanah antuk titiang indik wacanan gurune !Dadosne guru ngajahin tiang dharma weci riinan, wantah ja nika pinaka dasar anggen tiang nincepang paplajahan dharma patute ! boya ja sapunika guru ? Beneh keto nyen keto Sembyar, keto paneges gurune.

              Biin  I Sembyar nglanturang raosnyane, Yen asapunika sampun resep dadosne  tiang man gkin. Yen nirgamayang tiang sakadi rwa bhinedan jagat, wantah pamedalan lan panunggalannya dados siki, kenten guru ?. To….to……enggal ja ragane ngerti teken raos guru ! satmaka makebyar bintang – bintang dilangite , rasa kendel rasa bagya Guru Tegeh nyaksiang munyin I Sembyare buka keto.

              I Sembyar biin nimpalin raos gurune. Men ……sapunapiang tiang mangkin   ? ,Tiang sampun belus ngulurin indria, napi malih  tiang taler ngelarang kiwa, antuk swadharmaning dharma weci , amati – mati wong tan padosa, anut ajah – ajahan gurune riin!  Sane tuut incepang  titiang, yakti parek ring Ida Bhatari maraga bhairawi.

              Ulian raos I Sembyare buka keto, Guru Tegeh mitegesin biin, Nah …. Sembyar , kene nyen, anut dharma weci apa ne kajalanang ane malu tuah ja patut, kewala  yen ngelarang anesti aneluh anaranjana to ne makrana pegat jalan iragane ka swarga, uli nyujur ngalih lawang ane madan babahan sanga , tusing taen katepuk, mapan kaempetin baan bikas ane jele di mercapada.

              Nanjek raos Guru Tegehe , sinambi ngemu nambahin pamor di kekinangane ane kaemu di selagan isit bibirne, makada ngamarakang warnan bibih keto masih paesne. Biin Guru Tegeh ngaraos ,Jani ……Sembyar,  patut ane yakti alih, cara iraga ngalih lawat bulane, yen ada di junne ane puek, pasti puek kacingak lawat bulane, sawalikne yen dot ningalin lawat bulan di jun ane yehne ning, pastika ning lawat bulane kacingakin, ditu mara ngidang iraga adane nyujuh bulan , satmaka widi, karasa paek, kewala ida joh. Neti – neti kasengguh.

              Beh ……kanti tajeg sanghyang bhaskaradipati, reraosanne karasa sing nyarik – nyarik, iteh mangrengengan isin kakawin wirama toþàkane ane nadiang galang kenehe. Ditu lantas I Sembyar marasa teken dewekne kaliwat belog, yen inargamayang cara junne sing misi yeh ngalih lawat bulane, dong ja lawat ane kal katepuk , kewala pepineh lawat pedidi ane sing misi apa katepuk, apa buin ngalih lawat Widhi !. Dadine sing ada ane ngidang ngalih nyujuh bulan yen sing ulian kenehe suci, lascarya. Keto Idupne I Sembyar jani, suba meseh bikas , nilar sasana dharma weci, nincap nyujur dharma patut, satata ia nyuciang dewek, ngeret indria, pakedek pakenyung, satmaka jalaran ngalih widhi masadana nyujuh bulan.

                                                                                    Olih :

                                                                                    Aryya Paduhungan

                                                                                     22 September 2009