GEGURITAN SAMPIK INGTAI

Kacritayang wenten kocap anak lanang mapangkat mayor, magenah ring Waciu Negari, maderbe pianak bajang adiri mawsata Nyonyah Ingtai. Ni Nyonyah mamanah jagi masekolah ring Angciu Negari, raris nunas pacumponan pacang mapamit ring reramanipune. Makakalih reramannyane nenten pisan ngwehin ipun nglanturang masekolah, duaning genahnyane doh saha ipun madewek istri. Yadiastun asapunika, duaning meled pisan ipun pacang nglanturang masekolah, raris metu manahipun nyineb raga mabusana kadi anak lanang, rambutnyane kacukur, nganggen topi, saha maclana panjang.

Sarauhe ring tengahing pamargi, ipun macunduk ring anak lanang sane abra pisan saking Bociu Negari, mawasta I Babah Sampik. Tetujonnyane pateh kadi Ni Nyonyah jaga nglanturang masekolah ring Angciu Negari. Irika sang kalih mapinta tangan makenalan raris sinarengan nyujur genah sekolahane. Gelising cerita, sampun reke sang kalih katrima dados sisia irika, mawinan sahasa ngrereh padunungan. Sang kalih ngrereh kamar wantah asiki, pacang kanggen genah sirep sareng kalih.

Ni Nyonyah marasa ring padewekan rikuh pisan duaning ipun madewek istri pacang makalihan sareng anak lanang kadi I Babah Sampik. Punika mawinan ipun ngamedalang uwar-uwar, saha ngwatesin pasirepane antuk sabuk mangda nenten keni saling kosod. Daging uwar-uwarnyane, “Sapasira ja nglintangin sabuk punika, pacang keni danda marupa kertas, dawat, miwah mangsi”, pinaka sarana kanggen nyurat duk punika. I Babah Sampik satinut pisan ring daging uwar-uwarnyane, nanging sasampun makudang-kudang rahina, Ni Nyonyah Ingtai sane nimpahin I Babah Sampik, mawinan ipun patut naur danda kadi pasemayannyane.

            Nenten kawilangin sampun suennyane sang kalih masuitra, sirep sareng-sareng, masekolah sareng-sareng, malancaran taler sareng-sareng sakadi anake masemeton. Riantuk sampun rumaket pisan pasuitrannyane, Ni Nyonyah waneh ipun nyineb raga duaning sayan tumbuh rasa tresnan manahnyane ring I Babah Sampik. Irika raris ipun nyinahang raga, mungguing sujatinnyane ipun wantah anak istri sane nyineb raga mabusana lanang.

I Babah Sampik engsek, nyelsel dewek duaning nenten pisan maderbe rasa sangsaya ring manah, saha sampun sue pisan sirep sareng anak istri ayu. Nenten sue malih, I Babah Sampik ngwiwitin mapajar, mungguing ipun sampun banget kalulutan, tresna asih ring Ni Nyonyah. Ni Nyonyah taler asapunika, sampun saking sue ipun maderbe manah lulut asih ring I Babah Sampik.

            Durung puput sang kalih muponin rasa kalulutan matresna, raris rauh utusan saking reramanipune Ni Nyonyah sane mawasta I Congliwat mangda Ni Nyonyah sahasa budal ka Waciu Negari. Duaning kalintang bendu tur brangti, I Sampik polih marebat sareng I Congliwat, nanging prasida kaandeg antuk Ni Nyonyah Ingtai. Ni Nyonyah nunas mapamit saha mapajar mangda digelis I Babah Sampik mamadik dewekipune ka Waciu Negari. Ping tiga Ni Nyonyah majarang mangda ipun kapadik malih dasa rahinane, nanging I Sampik nampenin malih tigang dasa rahina.

Kacritayang rauh reke I Babah Sampik saha kulawargannyane mamadik Ni Nyonyah Ingtai ka Waciu Negari. Sakewanten Ni Nyonyah nenten nampenin saha nundung I Babah Sampik, riantuk ipun kabaos nitia wecana, linyok ring semaya, sampun telat kalih dasa rahina. Budal kocap ipun I Babah Sampik nyelsel dewek, sinengkaon nyakit ati, mawastu ipun padem.

            Lanturan critane, kabaosang mungguing sang kalih sida macunduk ring sunia loka. Ri kalaning Ni Nyonyah ngamargiang pawiwahan sareng I Bandar Macun, ring pamargi ipun tedun mabakti ajebos ring kuburan I Babah Sampike. Kacritayang kuburan punika engkag, belah, raris Ni Nyonyah ical, ngranjing ring kuburan. Para kulin I Bandar Macune sahasa ngalgal kuburan punika, nanging Ni Nyonyah nenten kakeniang. Wenten kocap cihna kekupu makalihan metu saking kuburan punika saha makeber nincap suarga loka. Kacritayang atman sang kalih rauh ring metu tumpang selikur, kayahin antuk watek widiadarine.

                                                                        Kaketus saking

                                                                    Buku Kumuda Sari 2